ازاي تعــرف انك في فرح مصــري اصلي ؟؟؟

ازاي تعرف انك ف فرح مصـري يا عم الحج ؟؟





من البدايه كدا هتلاقى الدعوه بتاعت الفرح جايالك
وعليها عباره
(جنه الاطفال منازلهم)

يعنى من الاخر ابنك دا يقعد فى البيت
ومايورناش وشه احنا مش عارفين نأكل المعازيم
لما هانأكل سعادته

لما تلاقى الزفه الدمياطى الازليه اياها
وبسم الله الرحمن الرحيم وهنبدا الليله اااااه اااه

وتلاقى البنات بيجروا ورا العروسه
عشان ينولوا شرف صحبتها كدا وهى داخله القاعه
ويتقاسموا شرف انهم يشيلوا ديلها (اقصد ديل الفستان)

لما تلاقى العريس بيبخر العروس
عشان الحسد احسن تتكسر ولا حاجه
وتلاقى العروسه بتبخر العريس
احسن دا واخد عليها كمبيالات وشيكات
وممكن يواديها فى داهيه

لما تلاقى بقا الستات بتمارس احسن هوايه ليها على مر التاريخ
وهى النميمه
ويقعدوا بقا يقولوا:
انا عارفه يا ختى اخدها على ايه دا لا مال ولا جمال
والتانيه تقولها :
والله يا ختى من ناحيه الجمال فهى شبه الليفه المحروقه
لكن من ناحيه المال لا دا الواد وقع واقف اه
دا ابوها عنده عربيه كارو اقصد (ماقطوره ) بتدخلوا شىء وشويات

وتلاقى البنات بقا واقفه اللى تقول:
ايه دا فستانها بيئه اوى ايا
والتانيه تقولها:
اكيد مأجراه من عند الكوافير اللى عملها التسريح
اللى شبه تسريحه المجانين دى ( ديه مش غيرة بنات بس هما بيحبوا الصراحة هعععع )

لما اول حجه تسمعها اول ما تدخل القاعه
وقبل ما تشوف العروسه والعريس
( اغنيه هشام عباس (اسماء الله الحسنى) ) مفيش فرح فيكي يا مصر من غير الاغنية ديه مش عارفة ليه كأنها طقوس

لما تلاقى بتاع الكاميرا بيزوم على الشبكه
كانها مثلا قلاده الملكه اليزابيث الخامسه والعشرين
وتلاقى كل المعازيم هايماوتوا بعض
وينطوا فوق بعض عشان يتفرجوا عليها

لما العريس والعروسه يرقصوا الرقصه الرومانسيه الازليه
على اغنيه(غمض عينك واحلم معايا)
او اغنيه تامر حسنى(ومايحرمنيش منك)
وكل البشر بيصوروهم بكاميرا الموبايل
وهما بيقولوا لبعض
(ياترى بيقولها ايه)

لما تلقى الاغنيه الرومانسيه اتقطعت فجأه كانهم بيقولولهم انجزوا
ويروحوا مشغلين اغنيه السهره(هاتجوز) للملك سعد الصغير
وبعدها العنب (هو اسمه ايه)

لما تلاقي ان الكوشة اتحولت لملعب كورة وتنس بسبب الاطفال ( نفسي اعرف ايه السبب حبهم في الكوشة )

لما تسمع السؤال الابدى
(هو البوفيه هايفتح امتى ...الواحد جاع)
لما يتعرض الفيلم التسجيلى البوفيه
وكل ما يحتويه من لحمه وفراخ وديك رومى وكشك وسد الحنك

لما تسمع الناس وهيه بتقول
لالالا بس الاكل مكانش قد كده

بعد تناول الطعام مباشره وعلى راى المثل
(بعد ما كل واتكى قال رحته مستكه)

لما تلاقى ام العروسه بتقول للعريس
خد بالك منها
والعريس يقولها
دى فى عينى يا طنط

لما تلاقى الزفه انطلقت فى الشوارع
مسببه الازعاج لخلق الله
وبيب بيب بيب بيب بيب بيب بيب بيب بيب بيب
~~~~~~~~~~~
وكالعادة في نهاية كل موضوع اقولكم من موقعي هذا
يا ويلــــــه اللي هيشوف الموضوع وميردش